Actualidade

Publícase hoxe, 2 de decembro de 2016, a Resolución do 7 de outubro de 2016, pola que se aproba a convocatoria ordinaria para solicitar a avaliación previa á asignación das retribucións adicionais relativas ao complemento de recoñecemento ao labor docente e ao complemento de recoñecemento ao labor investigador e se abre o prazo para a presentación de solicitudes.

Acceso á aplicación para cumprimentar a solicitude e os demais anexos.

O prazo de presentación de solicitudes será dende o día 5 de decembro de 2016 ata o día 3 de enero de 2017, incluído.

A aplicación para cubrir a solicitude e anexos estará aberta dende mañá día 3 de decembro de 2016.

ATENCIÓN! En aplicación do disposto no artigo 14.2 da Lei 39/2015, do 1 de outubro, do procedemento administrativo común das adiministracións públicas, a presentación de solicitudes deberá realizarse obrigatoriamene a través da sede electrónica da Xunta.

https://sede.xunta.gal

En caso de dubida, dificultades técnicas ou necesidade de máis información durante o proceso de obtención dos formularios na sede electrónica, poderán dirixir ao teléfono de información 012 ou ao correo electrónico 012@xunta.gal.

A ACSUG asistiu ao 11º European Quality Assurance Forum (EQAF), que tivo lugar entre o 17 e 19 de novembro de 2016 en Liubliana (Eslovenia). O EQAF é un foro anual que permite o intercambio de experiencias sobre a educación superior por parte de todos os grupos de interese: alumnos, universidades, axencias de calidade universitaria, etc.

Os días 20 e 21 de outubro celebrouse, na cidade inglesa de Gloucester, a Asemblea Xeral do ano 2016 da Asociación Europea para a Garantía da Calidade da Educación Superior (ENQA). A este evento asistiu o Director da ACSUG, representando á Axencia como membro de pleno dereito de ENQA.

A Asemblea Xeral foi precedida, como é habitual, dun foro ao que asistiron máis de 200 persoas pertencentes ás 49 axencias que forman parte de ENQA. Neste foro tratáronse diversos temas relacionados coa calidade da educación superior a través de relatorios, mesas redondas e paneis. Nesta sesión de paneis, a ACSUG presentou un póster sobre a inserción laboral dos titulados no Sistema Universitario de Galicia, nas titulacións de 1º e 2º ciclo, graos e máster. Durante a sesión intercambiáronse opinións cos asistentes en relación aos principais resultados obtidos, valorando aspectos relevantes na inserción laboral, tales como cantos titulados conseguiron un traballo aos dous anos de finalizar os seus estudos, onde o conseguiron, como o conseguiron e que competencias foron as más valoradas á hora de acceder ao seu posto de traballo.

Posteriormente, na Asemblea Xeral aprobouse a incorporación de novos membros a ENQA, entre os que se encontraba ACPUA, a Axencia de Calidade e Prospectiva Universitaria de Aragón, así que xa se eleva a 8 o número de axencias españolas membros de pleno dereito de ENQA. Despois da aprobación das contas anuais e o orzamento para o vindeiro ano, estableceuse un calendario de actividades a realizar en 2017.

O pasado 24 de outubro celebrouse na ACSUG unha xuntanza coas Escolas de Doutoramento, os Vicerreitorados de Títulos e as Áreas de Calidade das tres Universidades do Sistema Universitario de Galicia, co obxectivo de traballar sobre os contidos mínimos da guía de seguimento e renovación da acreditación dos programas de doutoramento.

O luns, 17 de outubro, a Axencia para a Calidade do Sistema Universitario de Galicia presentou a publicación: “Estudo da inserción laboral dos titulados no Sistema Universitario de Galicia 2011-2012”. No acto participaron o Secretario Xeral de Universidades, D. José Alberto Díez de Castro; a presidenta da ACSUG, Dona María Patrocinio Morrondo Pelayo e o director da ACSUG, D. José Eduardo López Pereira.

 

Esta publicación atópase enmarcada dentro dos estudos de inserción laboral dos titulados universitarios no Sistema Universitario de Galicia que se levan a cabo de forma periódica desde o ano 2001 na ACSUG. Nesta ocasión, complementando a serie temporal de estudos de inserción laboral dos titulados no SUG, presentanse os resultados acadados na décima enquisa realizada en decembro de 2014. A mostra enquisada representa arredor dun 58% da poboación total, 4.687 titulados en estudos de 1º e 2º ciclo (diplomaturas, licenciaturas, enxeñarías, arquitectura, enxeñarías técnicas e arquitectura técnica) e mais aos graduados. Dentro das principais conclusións extraídas do informe atópanse as seguintes:

 

Publícase a convocatoria para a solicitude de participación dos centros no proceso de Certificación da Implantación dos SGC.

O prazo para o envío das solicitudes comeza o día 24/10/2016 e finaliza o 25/11/2016.

As universidades interesadas deberán cubrir a solicitude de participación.

• Solicitude

Na sede da ACSUG estase celebrando o SEMINARIO INTERNACIONAL DE FORMACIÓN DE ESPECIALISTAS EN AUTOAVALIACIÓN E ACREDITACIÓN UNIVERSITARIA, ao que asisten varios profesores, estudantes e egresados da Universidade de San Martín de Porres (USMP) da cidade de Lima (Perú). Á apertura do acto asistiu o Secretario Xeral de Universidades, Prof. Dr. D. Xosé Alberto Díez de Castro e a Presidenta da ACSUG, Profa. Dra. Dona Patrocinio Morrondo Pelayo, xunto co Director da Axencia, Prof. Dr. D. José Eduardo López Pereira.

Os asistentes participarán activamente en cinco axustadas xornadas de traballo nas que se abordarán temas como “O papel da ACSUG nos diferentes programas de avaliación”, “O seguimento e acreditación de Títulos”, “O recoñecemento á excelencia curricular” e “A acreditación do profesorado”, sempre combinando a parte teórica e a práctica coa resolución de casos concretos.

O xoves e o venres as xornadas se levarán a cabo nas universidades de Santiago e da Coruña, onde, tras unha recepción oficial por parte dos respectivos Sres. Reitores, os asistentes recibirán explicacións sobre a percepción que ten a universidade das diversas avaliacións que leva a cabo a ACSUG no Sistema Universitario de Galicia.

Ao longo do pasado mes de xullo a ACSUG desenvolveu distintas actividades orientadas á mellora continua dos seus procedementos de avaliación de títulos (seguimento e renovación de acreditación) e de centros (sistema de garantía de calidade).

Inicialmente, coa finalidade de obter información dos distintos grupos de interese (coordinadores e responsables de títulos e avaliadores externos), leváronse a cabo os procesos de medición da satisfacción relacionados coa convocatoria 2015/2016 onde se valoraron, entre outros parámetros, aspectos relacionados coa documentación, organización e desenvolvemento dos distintos procesos de avaliación.

Posteriormente, celebráronse dúas xuntanzas na sede da ACSUG para analizar e reflexionar sobre toda a información dispoñible do proceso, detectar debilidades e propoñer melloras nos distintos procesos de avaliación.

Entre outros temas, traballouse en aspectos relacionados coa presentación da documentación dos títulos, guías, plantillas e prazos de avaliación, organización e desenvolvemento das visitas na renovación de acreditación de títulos, etc. Tamén se realizou unha primeira planificación da próxima convocatoria de avaliación, 2016/2017.

Xuntanza realizada cunha mostra representativa de avaliadores de cada unha das comisións de rama de coñecemento da ACSUG (14.07.2016)

Xuntanza realizada cos Vicerreitorados de Títulos e Áreas de Calidade das Universidades do Sistema Universitario de Galicia (21.07.2016)

O xoves 21 de xullo, a Axencia para a Calidade do Sistema Universitario de Galicia presentou a publicación: “Estudo da inserción laboral dos titulados en Másteres no Sistema Universitario de Galicia 2010-2011”. No acto participaron o Secretario Xeral de Universidades, a presidenta e o director da ACSUG.

Desde o ano 2001, a Axencia para a Calidade do Sistema Universitario de Galicia (ACSUG) ven proporcionando información sobre a integración no mercado laboral dos titulados no Sistema Universitario de Galicia (SUG) para os títulos de 1º e 2º ciclo (diplomaturas, licenciaturas e enxeñarías) e graos. Coa nova estrutura dos estudos universitarios actuais: grao, máster e doutoramento resulta indispensable dispor de información sobre a inserción laboral dos titulados en másteres. Por iso, no ano 2013, a Axencia iniciou un novo proxecto, ampliando o campo de estudo aos titulados en másteres no SUG, converténdose na primeira axencia a nivel nacional en realizar unha análise deste tipo. Continuando con esta iniciativa, a ACSUG publica o segundo informe enmarcado nesta temática: “Estudo da inserción laboral dos titulados en Másteres no Sistema Universitario de Galicia 2010-2011” (EILMásteres1011).

Nesta publicación, analizanse os resultados obtidos na segunda enquisa realizada aos titulados universitarios en másteres oficiais no SUG entre xuño e xullo de 2014, aproximadamente aos tres anos despois de rematar o máster. Entre os obxectivos principais deste informe están proporcionar información sobre os titulados universitarios en másteres no SUG, de xeito que os resultados acadados contribúan á mellora da calidade das ensinanzas universitarias ofertadas aos futuros estudantes. A información recabada contempla as seguintes temáticas: valoracións dos titulados en másteres sobre aspectos organizativos e de desenvolvemento do máster, motivación principal para realizar estudos de másteres e valoracións sobre a experiencia laboral nestes últimos anos, antes e despois da realización do máster. Así mesmo, o informe remata facendo unha comparativa dos resultados acadados nos dos últimos estudos entre os titulados en másteres 2010-2011 e 2009-2010.
A motivación principal para cursar estudos de máster é complementar a formación académica para obter unha maior especialización no mercado de traballo, cunha porcentaxe de 57,6%, seguida por complementar a formación académica previa para realizar o doutoramento e dedicarse a investigación, cunha porcentaxe de 30,1%, para o total do SUG. No tocante a distribución por ramas de coñecemento, o motivo de complementar a formación académica de cara ao mercado laboral é maioritario nas ramas de Enxeñaría e Arquitectura (68,0%), Ciencias da Saúde (61,4%) e Ciencias Sociais e Xurídicas (56,0%) fronte as ramas de Artes e Humanidades (53,8%) e Ciencias (51,6%) que acadan unhas maiores porcentaxes no motivo de complementar a formación de cara á investigación.

Con respecto a situación laboral previa á realización do máster, un 68,3% dos titulados másteres traballaban con anterioridade á realización do máster, un 8,5% buscaron emprego pero non o atoparon e un 23,2% nin sequera o buscaron. Así mesmo, no momento de comenzar o máster, o 61,6% simultanearon o traballo co máster, e tan só un 4,7% deixaron o seu emprego para cursar o máster.

Como novidade neste estudo, analízouse a traxectoria laboral dos titulados en másteres no SUG desde o momento no que remataron o máster ata a realización da enquisa. Un 91,9% dos titulados de máster traballaron nalgún momento desde que remataron o máster, porcentaxe que se divide nun 73,5% que traballa actualmente e un 18,4% que non traballa pero si o fixo desde que acabou o máster.

O tempo medio para que un titulado do SUG atope o seu primeiro traballo despois de rematar o máster é de 8,29 meses. Os titulados que acceden máis axiña ao mercado laboral tras o máster son os de Enxeñaría e Arquitectura (6,31 meses) e Ciencias da Saúde (6,36 meses).

Un 73,5% dos titulados en másteres no SUG traballaba no momento da realización da enquisa. Analizando a situación dos titulados que non traballan e tampouco buscan emprego, destacan as porcentaxes de titulados que realizan outros estudos (4,2%). A gran maioría traballa en Galicia 88,1%, mentres que só unha reducida porcentaxe traballa no estranxeiro, 1,7%.

Un 44,1% dos titulados en másteres do SUG afirman que o seu traballo está bastante ou moi relacionado co máster que cursou. Ademais, un 79,8% dos titulados considera que para o desenvolvemento do seu traballo actual é necesaria formación universitaria. Por ramas de coñecemento, os maiores niveis de vinculación entre o traballo e o máster danse nas ramas de Ciencias e de Enxeñaría e Arquitectura, onde case a metade dos titulados catalogan a relación como bastante ou moi relacionada.

Os titulados en másteres no SUG están satisfeitos cos estudos universitarios cursados. Case tres cuartas partes dos titulados en másteres volverían a realizar o máster.

A mostra enquisada neste estudo foi de 1.526 titulados en másteres no curso académico 2010-2011 sobre unha poboación de 2.099, representando arredor dun 72,70% da poboación total. O erro de mostraxe global acadado sitúase no +/-1,23%, cun nivel de confianza do 95%.

O día 19 de maio reuníronse na sede do CUD, na Academia Xeral Militar de Zaragoza, as Axencias de Calidade e os Centros Universitarios da Defensa. Á xuntanza asistiron os directores das axencias implicadas na avaliación deste tipo de centros e persoal técnico das mesmas que intercambiaron información, experiencias e resultados nos distintos procesos de avaliación e acreditación cos directores dos CUD e persoal da Academia Xeral Militar e o Ministerio de Defensa.

O obxectivo era un intercambio de opinións entre os asistentes sobre o sistema de avaliación e os resultados da acreditación, xa que algúns dos centros recibiron recentemente o certificado de acreditación, para mellorar procedementos e resultados en busca da mellora da calidade universitaria.

O director da ACSUG mantivo un seminario cos membros da axencia aragonesa, á que asistiu tamén o Director Xeral de universidades da Comunidade de Aragón e o director do Campus de Excelencia Internacional Iberus, no que expuxo o método empregado para a acreditación de universidades no ámbito internacional, especialmente en Iberoámerica, desde o momento da firma dun convenio xeral, pasando pola elaboración das guías correspondentes, a realización da visita externa ata a certificación final da acreditación dos correspondentes títulos.

A ACSUG segue a ampliar os seus horizontes internacionais, neste caso en Iberoamérica, onde está a avaliar diversas universidades, máis concretamente en Perú e en México.

Nesta ocasión o director de ACSUG desprazouse a Universidade Anáhuac de Xalapa (México), onde se procedeu á firma dun convenio entre ambas institucións para que a ACSUG leve a cabo un proceso de acreditación internacional de catro titulacións na devandita universidade, e aproveitou a ocasión para soster unha conferencia sobre “A calidade no modelo educativo universitario en Europa e en España” e manter varios seminarios cos profesores responsables da acreditación das titulacións que van ser sometidas ao proceso de avaliación.

O xoves 25 de febreiro de 2016, presentouse na ACSUG ante os vicerreitorados responsables do Programa DOCENTIA das tres universidades galegas e as unidades de calidade, a nova documentación do Programa DOCENTIA, que está en vigor desde este curso 2015-2016 e substitúe aos documentos e guías asociados ao Programa DOCENTIA dende a súa creación.

Na dita xornada aproveitouse para facer un repaso pola situación actual na que se atopa DOCENTIA a nivel estatal e os retos do Programa no futuro.

Ver documento

Nesta nova documentación especifícase o enfoque co que se aborda a avaliación da actividade docente do profesorado nas distintas fases do proceso: verificación dos deseños, implantación, seguimento, e certificación dos modelos de avaliación da actividade docente das Universidades.