PRESENTACIÓN DO SISTEMA  

2006-2009

A Axencia para a Calidade do Sistema Universitario de Galicia (ACSUG), dentro das súas funcións xerais de servizo á sociedade, así como a análise e mellora do Sistema Universitario de Galicia, decidiu, no seu momento implantar un Sistema de Xestión da Calidade segundo a norma UNE-EN-ISO 9001:2000. O 20 de marzo de 2006 obtívose a certificación externa, que estivo en vigor ata o 13 de marzo de 2009.

2009-2012

Tendo en conta que en marzo de 2009 terminaban os tres anos de certificación do Sistema de Xestión da Calidade, decidiuse ampliar o alcance do sistema de xestión, incluíndo todas as actividades que realiza a ACSUG, así como incluír a xestión medioambiental no sistema, integrando a norma ISO 14001:2004 no sistema xa existente. As razóns fundamentais foron as seguintes:

1) Incidir na Responsabilidade Social da ACSUG como organismo de control de calidade e servir de exemplo de boas prácticas ao resto do colectivo universitario.

2) Realizar unha mellor xestión dos residuos, eficiencia enerxética, recursos naturais consumidos e prevención da contaminación.

3) Incidir na realización eficiente e eficaz dos servizos prestados, incorporando criterios e boas prácticas ambientais no traballo diario.

4) Seguir fomentando a mellora continua como norma xeral de actuación na ACSUG.

Despois de realizarse os días 26 e 27 de febreiro de 2009 a auditoría de certificación por parte de AENOR, a ACSUG certificouse nas normas UNE-EN ISO 9001:2008 e UNE-EN ISO 14001:2004 o 13-03-2009. Ademais, ao ser AENOR membro da rede internacional IQNet de certificadoras, as certificacións obtidas pola ACSUG gozan de prestixio internacional e son recoñecidas en moitos países do mundo.

A ACSUG se converte así na primeira axencia de calidade universitaria en Europa que obtén estas certificacións.

ALCANCE DO SISTEMA DE XESTIÓN DA CALIDADE E DO MEDIO AMBIENTE

•  Prestación dos servizos de avaliación do profesorado previa á contratación polas Universidades de Galicia e avaliación para a asignación de complementos retributivos.

•  Prestación dos servizos de avaliación de títulos, asesoramento e seguimento dos Sistemas de Garantía Interna de Calidade dos Centros do Sistema Universitario de Galicia (Programa FIDES-AUDIT), seguimento da implantación de modelos de avaliación da actividade docente do profesorado nas Universidades de Galicia (Programa DOCENTIA), avaliación dos servizos e unidades administrativas do Sistema Universitario de Galicia e realización de estudos e análises de inserción laboral.